Мојата посета тука е прва официјална на грчки премиер во вашата земја. Изгубивме многу време. Мора да трчаме и брзаме бидејќи изгубивме три децении. Мора да ги преминеме сите овие јазови и да ги премостиме. Да преминеме од историја на војни и наратив на поделби и да се обидеме да изградиме нов наратив, на заедничка соработка и раст, рече во вторникот грчкиот премиер Алексис Ципрас на заедничката прес-конференција со премиерот Зоран Заев во македонската влада
Цирпас истакна дека Грција ќе продолжи со поддршката на Македонија во нејзините напори да продолжи со неопходните реформи и да стане дел од ЕУ.
„Нашата официјална посета денеска претставува историски чекор напред на Балканот и Европа. Ние сме тука да најдеме решение и да гледаме напред, да градиме мостови наместо ѕидови“, рече Ципрас.
Посочи дека на ниво на дипломатски односи создале амбасади и ќе ги заменат контакт точките што досега ги имале.
„Пред неколку месеци Грција беше првата држава што го ратификуваше пристапниот протокол за вашата држава кон НАТО, а денеска потпишавме меморандум за разбирање и унапредување на претпристапните и пристапните процеси на Северна Македонија во ЕУ“, порача Ципрас.
Нагласи дека најважното прашање на денешната средба била економијата, зошто, како што рече, мора да забрзаме и ги премостиме јазовите од минатото, како и да избегнеме двојно оданочување.
„Покрај тешкотиите има многу грчки претприемачи кои во моментот работат и се активни во Северна Македонија. Сепак, мојата делегација носи со себе повеќе од стотина претприемачи се со цел да се постигне подобра соработка и односи во иднина. Воспоставивме и координативен комитет за наша соработка, што ќе врши надзор и ќе ги поддржува таквите потфати во рамки на економските односи“, рече Ципрас.
Договорот за одбрана потпишан меѓу двете МНР, посочи Цирпас, претставува доказ за „волјата на Грција да помогне во градењето на одбранбените можности и капацитети на Северна Македонија“. „Оваа соработка е важна и опфаќа повеќе сектори. Тука се обуката, одбранбената индустрија, сајбер одбраната, военото разузнавање, како и воздухопловната политика“, додаде Ципрас.
Грција, продолжи грчкиот премиер, ќе врши обука на воздушната контрола преку Солун, со цел да се гарантира безбедноста на летовите над македонскиот воздушен простор.
За да имаме цврсти темели за соработка меѓу двете земји што ќе опстојат низ времето, Ципрас посочи дека мора интензивно да работиме за точно спроведување на Договорот од Преспа. „ Во овој краток период ние преземавме големи чекори напред и така треба да продолжиме и во иднина“, рече грчкиот премиер.
Посочи дека е важно да има институции во двете земји што ќе соработуваат меѓусебно и ќе вршат надзор во спроведувањето на договорот.
Премиерот Заев од своја страна потсети дека првпат во историјата грчки премиер е во посета на земјава, истакнувајќи дека оваа историска посета е силен израз на заедничката политичка волја и јасен знак за решавање на отворени прашања како придонес за еден нов Балкан.
„Од 17 јуни минатата година кога нашите две земји го потпишаа Договорот од Преспа пишуваме историја во неколу наврати. Грција е првата земја што го потпиша Протоколот за членство во НАТО, што е наш стратешки стремеж, а премиерот Алексис Ципрас упати повик до ЕУ да започне преговори за членство со нашата држава. Сето тоа е за победа на политиката на напредок, за мир и пријателство меѓу народите“, рече Заев по средбата со Ципрас.
Посочи дека политичката волја, пријателството и довербата изградена во изминатите месеци, не доведоа до денешната седница на Високиот совет за соработка меѓу двете земји, каде што го потпишаа Акцискиот план за зајакнување на сеопфатната соработка согласно Договорот од Преспа.
„Кога гледате кон минатото гледате пропуштени прилики, кога ќе погледнете во иднината гледате отворени можности и заеднички интереси. Двата соседа донесоа храбри одлуки со желба за заедништво, а она што изгледаше за невозможност денес е реалност“, истакна Заев.
Рече и дека се договориле до средината на мај заедничка експертска група за комерцијална употреба на името, терминологијата, брендовите, и додаде дека од огромно значење се потпишаните меморандуми од областа на транспортот и разговорите од енергетиката, соработките кои го подобруваат животот на граѓаните на двете земји.
„Месеците наназад стекнав добар пријател. Алексис е мој другар и пријател на нашата земја. Препорачувам сите ние да градиме пријателство со нашиот сосед Грција, и со останатите наши соседи“, подвлече премиерот Заев.
Заев истакна дека попладне заедно со Ципрас ќе го отворат бизнис форумот на кој, како што рече, ќе учествуваат над 400 стопанственици од двете земји и оти со овој форум ќе се обноват историски простори што ќе создадат можности за инвестициска, трговска и културна размена.
