Премиерот Зоран Заев ми нудеше влез во Владата и министерства за ВМРО-ДПМНЕ, за да го прифатам Договорот со Грција, но јас го одбив зашто честа нема цена, откри во петокот вечерта во Битола, челникот на најголемата опозициска партија, Христијан Мицкоски.
Господине Заев, во јануари 2018-та во Клубот на пратеници се гледавме очи в очи, кога ви кажав дека ВМРО-ДПМНЕ и народот ова нема да го поддржат. Ме гледавте и се согласивте со мене. Има записник. Дојде март, го повторивме истиот став заедно. Тајно преговаравте, ја парчевте, ја делевте, ја раскичмувавте татковината. Делевте и тргувавте со нешто за кое не сте се испотиле и крваревте за да го заработите. Луѓе гинеле за ова парче место. Дојде мај, исто така во Клубот на пратеници, ми рековте дека решението е Илинденска. Ви реков ‘мисли си ти само’. Ова е морковот господине Заев, а на дуелот на МРТ му реков ‘допрва ќе видиш што ќе прифатиш’. И дојде денот кога прифати. Ама прифати капитулација затоа што сакаше да прави криминал и да се спаси од затвор. Тоа е вистината. Капитулираше за да пљачка и да се спаси од затвор. Истиот ден кога прифати беше ослободен од Основниот суд за делото поткуп, посочи Мицкоски.
Потенцираше дека ставот на ВМРО-ДПМНЕ е одамна јасен и гласи: „Ние компромис со тие работи не правиме“!
Нас не нè интересира криминал и ние ако лежиме затвор ќе лежиме за Македонија и идеалите, а не за криминал. Заев е нечестит човек и одлучи на едно интервју да ме клевети дека немало да прави коалиција, техничка Влада со мене. Во јули, надвор имаше 38 степени, повторно бевме во клубот на пратеници. Се гледавме очи во очи, преговаравме и после пет часа ми рече: ‘Ајде, еве ти, влези во Владата и бирај кои сакаш пет министерства. Само прифати го Договорот’. Ти одговорив: ‘Мојот образ и достоинство немаат цена. Ова не го работам ниту за пари, ниту за моќ. Не ми треба твоето милосрдие. Уживај во твојата слава, уживај во твоите привилегии затоа што знам дека за пусти пари се работи, за ништо друго“,порача Мицкоски.
Лидерот на опозицијата рече дека ВМРО-ДПМНЕ никогаш нема да биде соучесник во капитулантски договор и оти се одлучиле да бидат „на страната на народот“.
Не го лажи народот. Еднаш кажи ја вистината. Нудеше – те одбивме. Затоа што не сакавме да бидеме соучесници во капитулацијата. Ја одбравме страната на народот, од првиот до последниот ден. Така и ќе биде во иднина, порача Мицкоск
