Портпаролката на руското министерство за надворешни работи Марија Захарова реагираше на изјавата на српскиот министер за стопанство Раде Баста дека постои можност Србија да ѝ воведе санкции на Русија.
Ова е досега прво отворено определување за санкции на еден владин функционер од почетокот на конфликтот во Украина и се разликува од официјалниот став на Белград.
„Србија веќе плаќа висока цена поради невоведувањето санкции против Русија и тоа станува неиздржливо“, кажа српскиот министер. Изјавата на Баста предизвика оградување на партијата Единствена Србија, од чија коалициска листа влезе во владата на Ана Брнабиќ, и барања на коалициските партнери да поднесе оставка.
„Српскиот министер за стопанство Раде Баста има некое чудно размислување кога кажува дека Србија треба да ѝ воведе санкции на Русија“, напиша Захарова на Телеграм.
Портпаролката на руското министерство додаде дека Русија, за разлика од Соединетите Американски Држави, отсекогаш ја почитувала Србија и нејзиниот народ. „Очигледно дека со воведувањето санкции на Русија притисокот на САД на Србија нема да исчезне, туку само ќе се зголеми“, напиша Захарова.
Доколку преземете содржина од оваа страница, во целост сте се согласиле со нејзините Услови за користење.