Зеќир Рамчиловиќ нов потпретседател на Собранието

19

Со 62 гласови „за“ и 12 „против“ независниот пратеник Зеќир Рамчиловиќ е избран за потпретседател на Собранието на Република Северна Македонија.

Изборот е направен во рамките на денешната работа по дневниот ред на 116-тата седница чие продолжение претседателот на Собранието Талат Џафери го закажа за утре.

Во расправата што претходеше на изборот, координаторот на пратеничката група на ВМРО-ДПМНЕ Никола Мицевски посочи дека начинот на изборот на Рамчиловиќ за петти потпретседател на Собранието е направен во интерес на квантумот на гласови кои му се потребни на мнозинството за седница и обвини дека на тој начин се продолжува со истиот принцип на кој претходно го бираа претседателот и останатите потпретседатели на законодавниот дом, како и петте заменици на генералниот секретар на Собранието. Го повика Рамчиловиќ кога ќе биде потпретседател на Собранието да работи на ист начин како што работеше, како што рече, во Извршниот комитет на ВМРО-ДПМНЕ.

Јусуф Хасани од ДПТ изборот на Рамчиловиќ на функцијата го оцени како историски момент, бидејќи прв пат се бира потпретседател на законодавниот дом од немнозинските заедници под 20 проценти.

– Не радува фактот што во нашата земја некои работи почнаа да одат на добро, рече Хасани и додаде дека неодамна Турчин беше избран за претседател на Уставен суд.

Антонио Милошоски од ВМРО-ДПМНЕ смета дека „за мнозинството во Собранието политичката трговија е поважна од принципите, а Рамчиловиќ е човек кој е купен за функција“.

-Денешната политичка трговија во Собранието е уште еден доказ дека политичката трговија е принцип на кој функционира оваа власт, рече Милошоски.

Неговиот сопартиец Влатко Ѓорчев посочи дека во Собранието има пет поптретседатели и пет земеници на генераниот секретар за да се задоволат партиските апетитити.

-Вреди ли да се погази се за три месеци да бидете функционер. Дали треба да има конзистентност или да го менуваме мислењето два, три, четири и пет пати, праша Ѓорчев  и додаде дека е очито оти со Рамчиловиќ имаат различни поимања и различни сваќања за чест и чесност.

Во реплика Рамчиловиќ му порача дека ВМРО-ДПМНЕ се најмалку повикани да говорат за чест и чесност и за политичка трговија.

-Вие тоа што го правите е крајно лицемерно – пред странците клечите, а она што го зборувате и работите пред јавноста е нешто друго. Сум зборувал дека сум против промена на уставното име на државата, но со вашите дејствија направивте народот да не може да си го каже својот збор и му го префрливте легитимитетот на Собранието. Доколку не гласав како што гласав за Уставните измени ќе морав да ја погазам својата заедница која ја поддржа промената на името, рече Рамчиловиќ.

Илија Димовски од ВМРО-ДПМНЕ во својот говор порача дека изборот на Рамчиловиќ за потпретседател на Собранието не се базира на искрени и чесни намери, туку исклучиво на математика и калкулации.

– Разочаран сум што Рамчиловиќ токму сега ја прифати функцијата, но не мислам дека е непристојно тоа. Но, сепак не мислам дека Собранието е пристојно место, потенцира Димовски.

Доколку преземете содржина од оваа страница, во целост сте се согласиле со нејзините Услови за користење.