Само полноправното членство во НАТО може вистински да ја заштити Украина, рече во петокот претседателот Володимир Зеленски додека неговата земја продолжува да бара безбедносни гаранции од Западот.
„Не бараме замена за НАТО и многу е важно нашите партнери да не слушнат“, им рече Зеленски на новинарите по средбата со естонскиот претседател Алар Карис во Киев. „Затоа имаме толку многу средби на највисоко ниво. Не бараме алтернатива“.
Зеленски тврди дека постојните обврски на членките на НАТО да се бранат меѓусебно ќе бидат „најдобрите безбедносни гаранции за Украина“.
Тој мислеше на членот 5 од Северноатлантскиот договор кој предвидува дека нападот врз една членка на воениот блок предводен од САД „ќе се смета за напад против сите нив“.
Во исто време, украинскиот лидер призна дека е малку веројатно неговата земја да може да се приклучи на НАТО додека не заврши вооружениот конфликт со Русија, соопшти неговиот кабинет. „Тоа не е затоа што не го сакаме, туку затоа што е невозможно“, рече тој.
Изјавата на Зеленски дојде откако францускиот претседател Емануел Макрон оваа недела сугерираше дека на Киев може да му се додели некаква форма на „опипливи“ безбедносни гаранции без формално да стане дел од НАТО.
Украина поднесе барање за приклучување кон западната алијанса во септември 2022 година, повикувајќи се на воената операција што Москва ја започна во соседната држава претходно истата година. Фајненшл тајмс во средата објави дека Зеленски им рекол на западните партнери дека нема да присуствува на самитот на НАТО во Литванија во јули, освен ако блокот не и понуди на Украина „конкретни“ гаранции или патоказ за членство.
Русија го смета континуираното проширување на НАТО кон исток како закана за нејзината безбедност и ја наведе помошта на земјите-членки за Украина како една од причините поради кои започна воената операција во соседната држава во февруари 2022 година. Москва неодамна изјави дека неутралноста на Украина ќе биде една од клучните услови за траен мир.
