Украинскиот претседател Влaдимир Зеленски синоќа ги предупреди Украинците да бидат внимателни следната недела, кога земјата ќе го слави денот на својата независност, откако одекнаа нови експлозии на Крим и ракета рани 12 цивили во близина на нуклеарна централа.
Во своето вечерно видео обраќање, Зеленски рече дека Украинците не смеат да дозволат Москва да „шири очај и страв“ меѓу нив додека одбележуваат 31 година од независноста од советската власт.
„Сите ние треба да бидеме свесни дека оваа недела Русија може да се обиде да направи нешто особено грдо, нешто особено злобно“, рече Зеленски пред годишнината на 24-ти август и шест месеци од почетокот на руската инвазија во Украина.
Во своето обраќање, Зеленски индиректно ја спомена и серијата експлозии во последните денови на Крим, црнморски полуостров кој по превратот во Киев во 2014 година преку референдум ја врати автономијата укината со прогласувањето на независноста на Украина и се врати во составот на Русија од кој е административно издвоен во 1954 година со указ на тогашниот советски челник Никита Хрушчов, етнички Украинец. Западот го смета за украинската територија нелегално анектирана од Русија.
Украина не ја презеде одговорноста за нападите, но аналитичарите велат дека барем некои од нив биле овозможени со новата технологија што ја користат украинските сили.
„Оваа година можете буквално да го почувствувате Крим во воздухот, дека окупацијата таму е само привремена и дека Украина се враќа“, рече Зеленски.
Русија и Украина повторно разменија нови обвинувања за гранатирањето на областа на нуклеарната централа Запорожје, која од март беше преземена од Русија. Владимир Рогов, администратор назначен од Русија во блискиот град Енергодар, рече дека украинските сили ја нападнале централата најмалку четири пати. Евгениј Етушенко, градоначалник на Никопол, кој е под контрола на Украина, на спротивниот брег на реката Днепар, рече дека руските сили постојано го гранатирале градот.
