Градоначалникот на Валандово, Николче Чурлиновски денеска даде отчет за сработеното во изминатата година при што истакна дека се реализирани повеќе од 85 проценти од програмата за работа, но оти се исполнети и многу други проекти надвор од програмата кои произлегле од потребите на граѓаните.
– Во комуналната сфера направивме организирано собирање на отпад во сите населени места, особено во Пирава и Јосифово, а сега почнуваме и во Удово. Отворивме Дневен центар за децата со посебни потреби и зона за дистрибутивни центри и откуп на земјоделски производи во која веќе продадовме седум парцели, рече Чурлиновски.
За годинава, Чурлиновски најави доуредување на булеварот кој минува низ Валандово, отворање на градинка во која ќе се згрижат децата од четири населени места, а до летото се очекува да стартува со работа и фабриката кај рудникот Казандол.
– Посебно внимание ќе посветиме на подобрување на вработувањето со рестартирање на бившиот објект на фабриката „6 Ноември“ којшто е во сопственост на државата. По завршувањето на правните работи ќе им понудиме на граѓаните стотина нови работни места, рече Чурлиновски и додаде дека ќе продолжат да ги реализираат и заедничките проекти преку ИПА програмата со општини од Република Бугарија.
