Првиот човек на австриските железници ОББ, Кристијан Керн најверојатно ќе биде идниот канцелар на Австрија, објави денеска „Дојче Веле“.
Се очекува Керн во вторник да биде избран за нов лидер на владејачката Социјалдемократска партија на Австрија (СПО), со што потоа би ја преземал и канцеларската функција.
Извори во партијата за Дојче Веле изјавиле дека се очекува 50-годишниот Керн „во блиска иднина“ да ја преземе должноста австриски канцелар, но дека засега не е утврден конкретен датум за тоа.
Досегашниот австриски канцелар и лидер на СПО, Вернер Фајман на 9 мај поднесе оставки на сите функции, со образложение дека се решил на таков потег затоа што ја загубил подршката во редовите на неговата партија.
Оставката на Фајман уследи откако канидатот за австриски претседател на СПО, Рудолф Хунсторфер на изборите на 24 април го освои четвртото место со 11,3 отсто од гласовите и не успеа да се пласира во вториот круг.
По оставката на Фајман се шпекулираше со можноста за одржување предвремени парламентарни избори, но в.д. канцеларот Рајнхолд Митерленер во втроникот ја отфрли таквата можност.
