Педесетина апликации се пристигнати на третиот повик за поддршка на иновативни проекти, објавен од Фондот за иновации и технолошки развој.
– Најголемиот дел од апликациите се за проекти од ИТ индустријата, образование, управување со човечки ресурси, но има и доста проекти што се занимаваат со нови технологии и слично, изјави Јасмина Поповска, директорка на Фондот за иновации, одговарајќи на новинарски прашања на денешната прес-конференција за повиците за натпревари за софтверски решенија за градскиот превоз во Скопје.
Како што информира Поповска, до крајот на месецов ќе се знае кои од апликациите ќе бидат претселектирани, а до крај на следниот месец треба да биде донесена одлуката за избраните проекти.
Проектите од останатите повици, потенцира Поповска, се во тек. Шеснаесетте проекти коишто почнаа во јуни лани веќе завршуваат и имаат конкретен резултат. Проектите за коишто средствата ги доделивме во јануари годинава се во фаза на имплементација и нормално е некогаш со одредени посметувања од планираното, но главно е што се се одвива како треба. Се надеваме дека наскоро ќе ги промовираме, изјави Поповска.
Фондот за иновации со третиот повик доделува 30.000 евра по предлог проект преку Инструментот за поддршка Кофинансирани грантови за новоосновани трговски друштва старт-ап и спин-оф. За овој инструмент може да добијат средства за микро, мали и средни претпријатија кои постојат не подолго од 6 години во моментот на аплицирање до Фондот.
