Во последниот неделен натпревар од 26. коло во италијанското фудбалско првенство, Јувентус го совлада Каљари со 1:0 на гостински терен и се искачи на четвртото место.
Решавачкиот гол го постигна Душан Влаховиќ во 12. минута од натпреварот. Српскиот напаѓач му ја „украде“ топката на невнимателниот Јери Мина, се упати кон противничкиот голман, го заобиколи и погоди за водство на торинската „Стара дама“. Подоцна тоа се покажа како единствениот гол на натпреварот кој на гостите им донесе три бода.
Со оваа победа Јувентус го прескокна Лацио и сега е четврти со 49 бодови, додека Каљари е на 15. позиција со 25 бодови, четири повеќе од зоната за испаѓање.
Во претходниот натпревар фудбалерите на Аталанта убедливо со 5:0 го совладаа Емполи на гостински терен и останаа во борба за шампионската титула.
Гостите поведоа во 27. минута со автоголот на Емануел Ѓаси, шест минути подоцна Матео Ретеги ја зголеми предноста на гостите, а сите сомнежи околу победникот ги реши Адемола Лукман во 43. минута. Во вториот дел гостите постигнаа уште два гола, Лукман уште еднаш во 55. минута, а Давиде Запакоста го заклучи во 74. минута.
Аталанта е трета со 54 бода, три помалку од лидерот Интер.
Втор со 56 бода е Наполи, кој на првиот меч во неделата загуби од Комо со 1:2. Дефанзивецот на Наполи, Амир Рахмани го доведе Комо во водство со автогол во седмата минута, додека Наполи израмни со голот на Џакомо Распадори во 17. минута. Победничкиот гол за Комо го постигна Шпанецот Асан Диао во 77. минута. Иван Смолчиќ го одигра целиот натпревар за Комо. Комо е на 13. место во поредокот со 28 бодови.
Верона ја совлада Фиорентина со 1:0, освојувајќи важни бодови во борбата за опстанок во првата лига.
Решавачкиот гол го постигна Антоан Бернеде во петтата минута од судиското надополнување.
Верона се искачи на 14. место со 26 бодови, пет над безбедносната зона, додека Фиорентина е шеста со 42 бода.
