Американските власти денеска соопштија дека најмалку шест лица загинаа, а неколку десетици се повредени во бури и торнада кои го зафатија источниот дел од САД.
Тие нагласија дека очекуваат бројот на жртвите да се зголеми.
Агенцијата за управување со вонредни состојби во Мисисипи соопшти дека најмалку 40 лица се повредени ширум земјата.
Во серијата торнада, кои вчера погодија неколку држави во САД, голем број куќи се сериозно оштетени, а некои се срамнети со земја, додека најмалку две лица се водат како исчезнати.
Најмладата жртва е седумгодишно момче од Мисисипи, кое настрадало, откако торнадо го крена во воздух автомобилот, во кој се наоѓало.
Националната служба за временска прогноза, која издаде неколку предупредувања поради лошите временски прилики, соопшти дека опасноста не минала, а уште посилно торнадо им се заканува на Тенеси, Алабама, Кентаки и Мисисипи.
Околу 70 милиони луѓе живеат во областите, кои се погодени од бури и силни торнада.
