Белгискиот интернационалец од редовите на лондонскиот премиерлигаш Челзи, Еден Азард, откри дека нема да ја промени клупската средина за време на летниот преоден рок и додаде дека моментално преговара за нов договор.
“Едно е сигурно. Можам да гарантирам со 100% сигурност дека и во новата сезона ќе го носам дресот на Челзи. Нормално дека нема ништо сигурно кога е во прашање фудбалската игра, но јас имам договор со Челзи и не сакам никаква преселба од “Стемфорд Бриџ”. Моментално преговарам со раководните лица на Челзи, преговараме за нов договор. Челниците на Челзи ми понудија нов договор, а тоа е доказ дека веруваат во мене, веруваат во моите квалитети. До овој момент, не сум остварил никаков контакт со раководните лица на ПСЖ и не е точно дека сум добил понуда од францускиот клуб”, изјави Азард.
Во изминатата сезона, Еден одигра 55 натпревари во дресот на Челзи, постигна 18 погодоци и запиша 10 асистенции.