Според информациите од УХМР, нов јужен бран од дождови ќе ја зафати Македонија во петок попладне. Утре ќе дува засилен, повремено силен јужен ветер со удари и над 80км/час. Попладне и во текот на ноќта кон сабота ќе има врнежи од дожд кои во западните и јужните делови ќе бидат пообилни (локално од 40л/м2 до 60 л/м2). На планините врнежите ќе бидат од снег, каде снежната покривка ќе се зголеми. Нови пообилни врнежи ќе има во сабота ноќта и во недела кога врнежите ќе бидат и поројни, проследени со грмежи и силен ветер.
Дополнително се очекува водостојот на реките да се зголеми со топење на снеговите и се очекува излевање на реките со што се подигнува алармантноста со хидролошката состојба.
Остануваат препораките на Координативното тело:
- градоначалниците да ги стават на готовност сите расположливи ресурси,
- градоначалниците да ги мобилизираат кризните штабови и во нив да ги вклучат, претставници од ЦУК, ДЗС и МВР,
- градоначалниците кои имаат потреба од дополнителна помош од технички ресурси (механизација, вреќи и нафта) веднаш да се обратат до Дирекцијата за заштита и спасување,
- градоначалниците да ги информираат месните заедници за најавената дестабилизација на временските услови,
- континуирано да се следи водостојот на реките, да се следи и нивото на акумулациите.
- ЕЛС да интервенира на мостови каде има опасност од задржување големи наноси од надојдените реки,
- сите граѓани кои сметаат дека се загрозени да се обратат на бесплатниот број 195 на ЦУК,
- припадниците на МВР и Министерството за одбрана да бидат подготвени за интервенција
- возачите навремено да се информираат за состојбата на патните правци од страна на АМСМ,
- екипи од ЕВН и ДЗС да воведат дежурни служби
- апел до месното население да се вклучи во превентивните акции.