На државните универзитети во Македонија денес почнува новата академска година. За новите студенти ќе биде организиран прв академски час на факултетите, а на некои од нив ќе присуствуваат ректорите на универзитетите и претставници од ресорното Министерство.
Адеми на прв академски час во Тетово, Ристовски во Штип
На првиот академски час на Државниот универзитет во Тетово ќе присуствува министерот за образование и наука Абдилаќим Адеми и ректорот Вулнет Амети, а на Штипскиот универзитет „Гоце Делчев“ свеченоста за студенти од Медицинскиот, Правниот и од трите академии ќе биде организирана во Мултимедијалниот центар на Економскиот факултет каде ќе се обратат заменик-министерот за образование и наука Спиро Ристовски и новиот ректор Блажо Боев.
Од Скопскиот факултет „Св. Кирил и Методиј“ информираат дека ректорот Велимир Стојковски ќе ги поздрави бруцошите на Медицинскиот факултет, а на битолскиот Универзитет „Св. Климент Охридски“ новоименуваниот ректор Сашо Коруновски ќе се обрати пред студентите на Техничкиот факултет.
За упис во прва година на државните универзитети имаше два рока – во август и во септември.