-Вчера Катица Јанева со неколку збора си кажа што таа, всушност, мисли за својата држава, за своите сограѓани, и колку за неа има вредност и значење македонската држава и македонската нација. Најтрагично од се е што таа е убедена дека реченото е вистина, дека таа се бори за македонската вистина, на идентичен начин како што Заев се бори за вистината. А за неа вистината е нелегитимна Република Македонија. Свесна или несвесна за вчера искажаните зборови, Катица Јанева станува директен соработник и учесник во мастер планот за рушење на македонската држава, вели Каракамишева- Јовановска.
Универзитетската професорка додава дека со негирање на легитимитетот на македонските политички институции, вклучително и правните органи, Јанева вчера ја негираше изборната волја на граѓаните, го негираше правото на секој граѓанин да одлучува за својата држава.
-Таа со ова се стави над сите граѓани, над Уставот, над законите. Единствен легитимен орган според нејзе е Специјалното јавно обвинителство што е невиден правнички срам и основно непознавање на легитимитетот и на легалитетот како основни категории во правниот систем. Негирањето на македонската држава од страна на официјален државен орган е секако голема помош за оние внатрешни групи и сили што работат во насока на дезинтегрирање на Република Македонија, но секако и голема помош на Република Грција во давањето дополнителна македонска енергија на нивната теза дека нашата држава е вештачки креирана творба, и дека како таква треба да се уништи, заклучува Каракмишева- Јовановска.