Заменик-министерот за образование и наука Спиро Ристовски денеска го посети училиштето и изјави дека е особено задоволен кога им се помага и се инвестира за ученици со посебни образовни потреби. Ја поздрави иницијативноста на директорот и училишниот одбор во „Димитар Влахов“ за проектите што досега ги реализирале.
– Министерството заедно со училиштето инвестираше околу 2,5 милиони денари за потребите на ова државно училиште. Ние ќе продолжиме со капитални инвестиции за потребите на учениците со оштетен вид. Генерално граѓаните и учениците со оштетен вид и натаму ќе бидат во фокусот на Министерството за образование и наука. Ние ќе ја продолжиме интензивната комуникација и поддршка на здруженијата на слепи лица во Македонија и да ги поддржуваме нивните потреби за секојдневно да функционираат. Пред се, за учениците за полесно да ја совладуваат наставната програма, рече Ристовски.
Директорот на училиштето Горанчо Јакимов се заблагодари на МОН за оваа капитална инвестиција, напомнувајќи дека во изминатите години со поддршка на ова и на други министерства, значително се подобрени условите за настава како и квалитетот на самата настава.
– Во училиштето не се инвестираше со децении. Но оваа Влада во изминатите десет години има чувство кон оваа категорија ученици, кои од инвестициите добија услови онакви какви што им се потребни и какви што заслужуваат, рече Јакимов.
Во објектот настава следат 50-ина ученици – и во основното, и во средното училиште. Најголем дел се од Скопје, но има и ученици од околните градови (Куманово и Тетово) кои патуваат секој ден, како и ученици од други градови кои се сместени во ученичкиот дом.
