СДСМ во денешното соопштение апелира да се овозможи мирен и сигурен трансфер на власта и претседателот Ѓорге Иванов да постапи согласно Уставот и да го додели мандатот за составување нова влада.
– Формирањето нова влада и спроведувањето на реформските приоритети е врвен државен интерес и секое постапување против државните интереси е кривично дело казниво со закон. Апелираме до сите да постапуваат разумно и законски, за да се овозможи мирен и сигурен трансфер на власта, наведува СДСМ.
Во соопштението се додава дека граѓаните го очекуваат формирањето на новата влада за конечно, како што се вели, да почнат промените за добар и достоинствен живот за сите.
– Тоа што новата влада ќе пристапи кон зголемување на минималната плата, ќе биде укината радиодифузната такса, ќе биде воведена дневната евтина тарифа на струјата и цел викенд евтина струја се само некои од првите мерки од коишто граѓаните ќе почувствуваат олеснување во семејните буџети, стои во соопштението.
Од СДСМ посочуваат дека новата влада е неопходна и поради евроинтеграциските процеси на земјата, која долго била блокирана и изолирана поради, како што се вели, криминалните интереси на Никола Груевски и на раководството на ВМРО ДПМНЕ.