Целта на патувањето на Зоран Заев во Брисел не смее да се сведе само на одмрзнување на препораката за отпочнување на преговорите за членство, затоа што Република Македонија осум години по ред добиваше позитивна препорака за отпочнување на преговорите, која беше условена последниве две години токму заради политичката криза во којашто СДСМ ја втурна државата, порачуваат од ВМРО-ДПМНЕ.
„Зоран Заев вети на граѓаните брзо членство во ЕУ и НАТО, без да се задира во идентитетските прашања и без да се прават договори на штета на македонскиот народ и држава“, потсетуваат од партијата.
Од ВМРО-ДПМНЕ предочуваат дека граѓаните очекуваат ветувањата да бидат исполнети, а не да се намалуваат очекувањата и да се нуди како успех нешто што веќе било сработено.
„Целта на патувањето во Брисел не смее да бидат само најави за разгледување на можностите за членство на Република Македонија во НАТО, туку мора да се испорачаат резултати“, се порачува во писмената реакција на најголемата парламентарна партија.
Порачуваат, исто така, дека СДСМ не треба да одмолчува и да се обесхрабрува пред повторувањето на грчките црвени линии, според кои не треба да се помислува на членство во НАТО додека не се реши проблемот кој Грција го има со името на Република Македонија.
„Министерот за надворешни работи не смее да дава конфузни изјави во интернационалните медиуми кои ги вознемируваат граѓаните и отвараат сомнеж дека СДС размислува за промена на уставното име. Ваквите изјави може сериозно да ги загрозат македонските преговарачки позиции“, предупредуваат од ВМРО-ДПМНЕ.
„Граѓаните очекуваат на дело да го видат ветеното од СДСМ, а не преку медиумите под нивна контрола да се обидуваат да ја дефокусираат јавноста од тоа до каде се ветените 30.000 денари просечна плата и 16.000 денари минимална плата за кои во изборниот период говореа дека ќе ги реализираат. Лекарите од СДС го очекуваат подобриот стандард и 100.000 плата. Граѓаните од СДС ги очекуваат и новите 500 километри автопат кои Заев им ги вети, но и 5 отсто раст на економијата на годишно ниво, граѓаните очекуваат и 30.000 денари на крајот на годината од поврат на 15 проценти од потрошеното ДДВ“, се потсетува во реакцијата и се заклучува дека граѓаните очекуваат дела, а не изговори.
