Русите ги проверуваат информациите за ликвидацијата на челникот на ИД

© AFP 2017 / Prakash Singh

Руското министерство за одбрана преку различни канали ги проверува информациите за ликвидацијата на лидерот на екстремната организација Исламска држава (ИД), Ибрахим Абу Бакар ал-Багдади, во текот на бобардирањето на руската воена авијација во Сирија, соопшти министерството.

Во соопштението кое го пренесуваат руските медиуми во петокот се наведува дека водачот на исламистичката организација можеби бил убиен во текот на нападот извршен на 28 мај, во јужно предградие на сирискиот град Рака.

Во тој напад на руската воена авијација биле убиени високо позиционирани милитанти, кои биле членови на ткн „воен совет“ на Исламската држава, и уште околу 330 џихадистички борци.

Според руското министерство за одбрана, меѓу ликвидираните терористи се и „емирот“ на Рака, Аби ал-Хаџи ал-Масри, Ибрахим ан-Наеф ал-Хаџ кој го контролирал подрачјето од Рака до Сухна, како и „началникот за безбедност“ на Исламската држава, Сулејман ал-Шаух.

Информациите за ликвидацијата на челникот на џихадистите, руското министерство за одбрана ги добило кон крајот на мај, се наведува во соопштението. Се додава дека од тогаш се вршат проверки при кои е дојдено до сознанија дека целта на состанокот била планирање излезни правци на милитантит од градот Рака преку ткн „јужен коридор“.

Руската авијација споменатиот напад го извршила ноќта на 28 мај, откако податоците за место и времето на закажаната средба на челниците на џихадистите биле потврдени со помош на шпионски беспилотни летала. Притоа за воздушната операција Москва ја известила американската страна.

Ал-Багдади, чие вистинско име е Ибрахим Авад Ибрахим ал-Бадри, инаку поранешен заточеник во американскиот злогласен затвор за осомничени за тероризам Гвантанамо, првпат во јавноста се појави во јули 2014 година во ирачкиот град Мосул кога го прогласи „исламскиот калифат“ на Блискиот исток, односно на заземените територии во Ирак и Сирија. Во изминативе речиси три години светските медиуми повеќепати известуваа за негови ликвидации, но до денес нема потврда на ваквите вести.

Американското и ирачкото разузнавање претпоставуваат дека лидерот на Ислмската држава може да се крие во регионот околу ирачкото место ел-Баад, недалеку од сириската граница. Весникот Daily Mail на 11 јуни повикувајќи се на сириската државна телевизија објави дека ал-Багдади најверојатно е ливидиран во воздушен удар во Рака. Истовремено новинската агенција Amaq поврзана со џихадистичката организација не објави потврда на ваквите информации.