Сиромаштијата во Македонија двојно ќе се зголеми, со зголемувањето на даноците кое е најавено до крајот на годинава. Покачувањето на даноците само ќе го забрза крахот на економијата и ќе предизвика осиромашување на граѓаните, предупредуваат од Граѓанското движење против осиромашување.
Најавеното зголемување на даноците може да предизвика сериозни последици, како за економијата, така и за вработеноста и стандадот на граѓаните. Граѓаните стравуваат дека покачувањето на даноците може да предизвика негативни последици кои ќе доведат до осиромашување на народот, а со тоа и до зголемено незадоволство.
„Зголемените даноци значат сериозно загрозување на пред се помали фирми и претпријатија во Република Македонија кои ќе се доведат до работ на егзистенција. Ваквата ситуација може да предизвика евентуално даночна евазија, што ќе се одрази на ликвидноста на буџетот, од кој зависи изградбата и реконструкцијата на училишта, болници, градинки, патишта, водоводи и канализации“, велат од Граѓанското движење против осиромашување.
Предупредуваат дека, од друга страна, сопствениците на фирмите со цел да го задржат профитот може да се одлучат за намалување на платите или отпуштање на работници, што ќе предизвика намалување на стандардот на семејствата во Македонија и нивно доведување до работ на егзистенцијата.
„Најавите на Владата за ваквиот чекор доаѓаат без реална основа, анализа и процена, а најмалку од сѐ има издржана дебата, во која сите субјекти, експертите, работодавачите и синдикатите, но пред сѐ граѓаните, ќе може да го кажат своето мислење за вака сериозна тема. Штетите од неоправданото и неиздржаното зголемување на даноците се повеќекратни и затоа ние стравуваме дека најлошо ќе се одразат на грбот на обичниот човек кој вредно работи а да обезбеди иднина за себе и за своите деца“, велат од граѓанското движење.
Зголемувањето на трошоците за живот и падот на стандардот веќе почна, цените се зголемија за 4 отсто, индустријата бележи пад на производство, економијата ги чувствува првите последици. Зголемувањето на даноците само ќе го забрза крахот на економијата во државата и ќе предизвика осиромашување на граѓаните, предупупредуваат економските познавачи.
Според најавите, Владата на Зоран Заев ќе ја промени даночната политика и наместо рамен ќе воведе прогресивен данок. Лидерот на ВМРО-ДПМНЕ, Никола Груевски смета дека оваа одлука е голема грешка, бидејќи Република Македонија досега добиваше честитки за рамниот и низок данок.
„Ако Владата мисли дека на овој начин ќе собере повеќе пари, греши! Зголемувањето на даноците најчесто носи помалку пари во Буџетот, затоа што се зголемува мотивацијата кај индустриските субјекти за одбегнување на данок. Ние кога ги намаливме даноците во 2007 година, добивме 20 отсто повеќе пари во Буџетот. Тоа ја потврдува тезата дека пониските даноци, не само што му помагаат на стопанството, на економијата, на граѓаните, туку помагаат и за повеќе средства во Буџетот. Секое планирање на зголемување на даноците, ќе им го влоши стандардот на граѓаните, а голем дел од компаниите ќе наоѓаат начин да избегнат плаќање на данок“, рече Груевски.
„Рецесијата веќе е реалност и ние со таа рецесија веќе живееме и прашање на ден е кога тоа ќе се официјализира, изјави Христијан Делев во своето гостување на ТВ Нова“, на темата „Економски ветувања и перспективи“.
Делев потенцираше дека во изминатите сто дена Македонија доживува едно тотално економско фијаско со сите тие мерки и сите тие акции што беа направени од новата Влада, посебно најзагрижувачки е тоа што целиот градежен сектор или целата градежна оператива престана со работа или сите тие капитални проекти се заглавени.
„Ако гледаме макроекономски ќе видиме дека градежништвото е сам по себе еден од најголемите контрибутори кон Буџетот. Се претпоставува дека директно и индиректно некаде помеѓу 25 и 30 отсто во Буџетот доаѓаат од градежништвото и цела таа оператива што е поврзана со градежништвото“, истакна Делев.
Додаде дека тоа што ни се случи во изминатиот период ќе има дополнителни негативни ефекти и дополнително ќе се намалуваат овие бројки и дека можеби ќе завршиме и со негативен раст.
