На синоќешниот митинг што се одржа во општина Ѓорче Петров, претседателот на СДМ ги повика граѓаните да се воздржат од било какви активности кои може да го нарушат изборниот процес и порача дека обврска на сите е да овозможиме кристално чисти избори и Македонија да оди напред по демократски пат.
„Ние сме демократска власт. Македонија ќе оди напред само по демократски пат. Во Република Македонија нема место за изборни нерегуларности и манипулации. Осудувам било каков тип на насилство во изборниот процес и повикувам на воздржаност од било каква активност која може да нанесе било каква дамка на изборите. Срушивме режим со пенкало. Во нашата политика нема место за омраза и агресија. Така и ќе продолжиме! Ние сме победници и немаме право, а имаме обврска да блескаат изборите, да има сјај, да имаме чисти кристални избори во оваа наша Македонија оти победуваме!И Македонија тоа го заслужува!
Затоа уште еднаш напомнувам, Владата и надлежните институции ќе имаат пристап на нула толеранција за евентуален обид за прекршување на изборниот процес. Никој да не помисли да си поигрува со волјата на гласачите. Македонија обезбедува слободни и демократски избори каде граѓаните слободно и без притисок го искажуваат своето мислење.
Ние градиме демократско општество за сите во европска и просперитетна Македонија. Таква ја имаме веќе четири месеци, таква ќе остане и таква ќе биде засекогаш “ им порача на граѓаните претседателот Заев од синоќешниот митинг на СДСМ и коалицијата којшто се одржа во општина Ѓорче Петров.
