Во последните месеци од минатата година беше изготвен нов текст на предлогот на Закон за приватните агенции за вработување, а во процесот беше обезбедено широко учество на сите засегнати страни, вклучително и на постоечките агенции за посредување за вработување и агенции за привремени вработувања, информираа во петокот од Министерството за труд и социјална политика.
Основањето и функционирањето на постоечките два типа на приватни агенции за вработување, агенциите за посредување за вработување во земјата и во странство и агенциите за привремени вработувања, беше уредено со два посебни закона, односно Законот за агенциите за привремени вработувања и Законот за вработувањето и осигурување во случај на невработеност.
Од министерстото појаснуваат дека ваквото уредување на споменатата материја, којашто по својата суштина е многу слична, честопати доведувала до забуна и правна несигурност кај потенцијалните кандидати за вработување и основачите на агенции.
Целта на сегашниот Предлог на Закон е да постои единствено регулирање на приватните агенции за вработување и надминување на постојните проблеми при имплементација на законите, кои како предмет на уредување ги имаат приватните агенциите за вработување, како и заштита на работниците вработени преку овој вид на агенции од можни злоупотреби.
Предлогот на Закон за приватните агенции за вработување беше ставен на разгледување на седница на Економско-социјалниот совет на која присуствуваа и преставници од агенциите. Советот, како национално трипартитно тело даде позитивно мислење за предлог Законот, и истиот е доставен до Владата на Република Македонија.