Ризикот од таканаречената „смрт во колепка“ или синдромот на ненадејна смрт на доенче (SIDS) може да биде зголемен поради ретките генетски мутации кои ги напаѓаат мускулите за дишење, предупредуваат научници во студијата објавена во стручниот магазин Lancet.
Ова истражување првпат ја изнесува можноста за поврзаност на SIDS, една од водечките причини за смрт кај доенчињата, со генетската мутација. Студијата ја спровеле научници во Велика Британија и во САД, а била концентрирана на SCN4A, за кој се верува дека има важна улога во разјаснувањето на SIDS. Мутациите на овој ген ги имаат помалку од пет луѓе на 100.000 лица.
Во студијата со којшато биле опфатени 278 деца кои починале од SIDS, научниците откриле четири случаи на мутации, додека во контролната група од 729 здрави деца не е најден ниеден случај на мутација.
„Нашата студија е прва која ја поврзува генетската причина послабите респираторни мускули со SIDS и сугерира дека гените коишто ја контролираат функцијата на мускулите за дишење би можеле да бидат важни во тој случај. Меѓутоа, ќе бидат потребни уште истражувања за да се потврди и во потполност да се сфати оваа врска“, вели професорот Мајкл Хана од МРЦ Центарот за невромускулни болести при лондонскот Универзитет Колеџ.
Засега SIDS претставува необјаснива смрт на наизглед здраво дете во првата година од животот, а вообичаено ги погаѓа бебињата меѓу вториот и четвртиот месеца. Во Велика Британија годишно се регистрираат 300 такви случаи, додека во САД ги има 2.400.
