Советот на јавни обвинители и денеска не избра шефови во обвинителствата низ Македонија. Седницата беше одложена за идната среда, а празни останаа 17 позиции. Дел од нив се во Вишото јавно обвинителство, но и раководни позиции во Скопското и во Обвинителството за организиран криминал и корупција. Советот побарал дополнителни информации за пријавените кандидати.
Седницата беше одложена од причина што членовите на советот со оглед на бројот на кандидати пријавени за постапката за избор на на јавни обвинители и со оглед на потребните проверки, треба да се прибават уште некои податоци кои се од значење за носење одлука за избор на обвинителите, изјави Коле Штериев, Претседател на Советот на јавни обвинители.
Штерјов не прецизираше за какви податоци станува збор и кои документи треба дополнително да се обезбедат, а не даде ниту прецизен одговор колку кандидати се пријавиле за Обвинителството за организиран криминал и корупција.
На почетокот од годинава Советот на јавните обвинители беше мета на критики во јавноста поради спорниот избор на обвинители во јануари кога Штерјов гласаше за внуката да стане обвинител во Обвинителството за гонење организиран криминал и корупција, а бвинителката Фиданка Рајевска гласаше против обвинителката која што го гони сопругот на Рајевска за перење пари.