Имаме добар договор на масата, за кој, како што рече премиерот на ПЈРМ, мора да се затвори многу наскоро. За жал, некои инсистираат на играње игри, изјавил во четвртокот доцна вечерта грчки владин функцонер за медиуми во Атина коментирајќи го соопштението на македонското Министерство за надворешни работи, јавуваат грчките медиуми.
Македонското министерство за надворешни работи во четвртокот вечерта информираше дека се работи врз постигнување договор за името, но дека „за вака значајни прашања не треба да се брза“.
„Во текот на разговорите беше покажана добра волја и беше постигнат добар резултат. Во овој момент, како и во секој процес од ваква природа, потребно е таа добра волја да се преточи од страна на работните групи во текст на договор, што на најсоодветен начин ќе ги отслика суштинските параметри од постигнатото политичко разбирање меѓу двете страни“, беше наведено.
Атинските медиуми веднаш ноќта кон петокот коментираа дека „зборовите употребени во соопштението и изнесениот распоред јасно покажуваат дека ниту денес, ниту утре во петокот нема да има телефонски разговор Ципрас-Заев и, се разбира, Преспанскиот договор за време на викендот“.
Премиерот Зоран Заев, од своја страна, пак, изјави дека спорот за името меѓу Македонија и Грција ќе се реши многу брзо.
„Многу важно ова да биде одржливо и трајно и да биде сто отсто безбедено за генерациите што доаѓаат и ќе го крепат ова пријателство со договорот што ќе го постигнеме. Како што гледате јас останувам оптимист иако не е лесно, чуствително е, но е многу важно“, изјави Заев.
