Oд одлуката на Заев да потпише договор со кој се менува името на Република Македонија во република Северна Македонија, презадоволни се соседите на Македонија, косовските претседател и премиер, Хашим Тачи и Рамуш Харадинај, како премиерот на Албанија, Еди Рама.
–Им честитам на премиерите Алексис Ципрас и Зоран Заев и нивните граѓани, напиша Тачи на Твитер.
Тој порача дека обновената можност за влез на Македонија во ЕУ и НАТО му помага и на Косово и на целиот Западен Балкан.
Харадинај на Твитер решавањето на прашањето за името го оцени како „одлична вест“.
–Им честитам на Заев и Ципрас на визијата и истрајноста. Се надевам дека сите преостанати отворени прашања на Балканот ќе бидат решени со ист конструктивен пристап, рече косовскиот премиер.
Своето воодушевување на Твитер по повод договорот на Македонија и Грција го искажа и албанскиот премиер, кој изрази почит за Зоран Заев и Алексис Ципрас.
–Два прогресивни лидери на соседните земји денеска влегоа во историјата и им порачаа на Европската унија и на целиот свет дека имаат визија и волја да ги надминат минатите пречки и да најдат простор за поглед кон иднината. Изразување на почит за Зоран Заев и Алексис Ципрас. Балканот денес е побезбедно место, пишува Рама на Твитер.