Претседателот на Здружението на градежништво, индустрија на градежни материјали и неметали при Стопанската комора на Македонија Андреа Серафимовски, денес потврди дека цената на становите во општина Центар нема да ја намалат цената, но затоа поевтинување се очекува во останатите скопски општини.
Апелираме до сите потенцијални купувачи да обрнат посебно внимание при купување стан во наредниот период. Досега побарувачката беше многу голема и се продаваа становите врз база на локацијата, изјави Серафимовски, дополнувајќи дека во иднина купувачите ќе ја диктираат цената во однос на квалитетот на градбата.
Здружението ќе држи обуки со цел граѓаните да го проценат квалитетот на материјалот, поседување сертификат, зелена површина, паркинг места , како и фактот дека скапиот стан не треба да се определува според локацијата, туку според материјалите кои придонесуваат во подобрување на условите за живот.
Според одобренијата за градење, во првите четири месеци од годинава е предвидена изградба на 2.150 станови, што е намалување од 29,64 проценти во однос на истиот период лани, кога биле предвидени 3.056, а се очекува и да нема дополнително поскапување како во 2008 година , кога државата очекуваше прием во НАТО и цената беше зголемена за 25 отсто.
Според податоците на Државниот завод за статистика, најмногу станови се градат во Центар, Аеродром, Карпош и Кисела Вода. Во општина Центар, цената за метар квадратен е 1. 300 евра, додека пак во Аеродром, Карпош и Кисела Вода се движи од 950 до 1050 евра.
Поради запирањето или забавувањето на крупните инфраструктурни проекти финансирани од државата за разлика од претходните години, лани градежништвото забележа пад во БДП од 13,7 отсто.
Серафимовски исто така смета дека новите инфрастуктурни проекти и реализација на најавените, ќе влијае во растот на градежништвото за разлика од периодот на проектот Скопје 2014.
Здружението исто така апелира да се надминат причините за застојот на изградбата на автопатот Кичево-Охрид, експресниот пат Градско-Прилеп и гасоводната мрежа кај Неготино, бидејќи тие придонесуваат во зголемување на загубите во градежниот сектор. Меѓу другото, вредноста на извршени градежни работи во странство лани во однос на 2016 година бележи пад од 37.2 отсто, а во периодот јануари-март годинава вредноста на договорените градежни работи во споредба со истиот период од минатата година бележи пад од 61.1 отсто, додека вкупната вредност на извршените градежни работи има пад од 12.6 отсто.