Во еден ден двајцата најдобри фудбалери на планетата во овој момент со своите селекции забележаа елиминација на Светското првенство во Русија, откако по Аргентина на Лионел Меси, куферите ги спакува и Португалија на Кристијано Роналдо.
Попладнево Аргентина во еден супер-атрактивен натпревар беше поразена од Франција со 4-3, додека вечерва во Сочи, Португалија беше тотално надиграна од Уругвај и на крај поразена со 2-1. Овие неуспеси на европскиот шампион и на сè уште актуелниот светски вицешампион, значеше и завршување на сонот на најголемите фудбалски ѕвезди на планетата Лионел Меси (32) и Кристијано Роналдо (33) за светска круна, кои во ист ден ги спакуваат куферите за дома.
За разлика од Меси, кој не само што не блесна на овој Мундијал и постигна само еден гол, Роналдо беше вистински лидер на својата селекција во групната фаза, но не успеа да го покаже својот раскошен талент и на вечерашниот меч со Уругвај. Интересен податок е тоа што и двајцата во групата промашија удар од 11 метри (Меси против Нигерија, а Роналдо против Иран), а исто така двајцата и во нивниот четврти мундијалски настап не успеаја да ја затресат противничката мрежа во еден натпревар од нокаут-фазата.