омандантот на Командата на американските сили во Европа и Врховната команда на НАТО за Европа, генерал Куртис Скапароти, денеска ја посети касарната „Илинден“, заедно со делегацијата од Министерството за одбрана и Армијата на Република Македонија.
Министерката за одбрана, Радмила Шекеринска, порача дека добила уверување од генералот Скапароти и целосна поддршка за нашата држав за членство во Алијансата.
„Чест е да се биде домаќин на Командантот на Врховната команда на НАТО и Командант на американските сили во Европа, генералот Куртис Скапароти. Поканата за членство во НАТО ја стави нашата земја на мапата за посети на највисоки воени и политички претставници. Од генерал Скапароти добив уверување дека како држава, како Влада и Министерство за одбрана ја имаме целосната поддршка за успешно да ги направиме претстојните финални чекори кон полноправно членство во Алијансата“, посочи Шекеринска.
Командантот на американските сили во Европа и Врховната команда на НАТО за Европа, генерал Куртис Скапароти заедно со делегација од Министерството за одбрана и од Армијата на Република Македонија, предводена од министерката Радмила Шекеринска, во касарната „Илинден“ проследи показна вежба изведена од припадниците на Полкот за специјални операции во АРМ.
Македонските специјалци пред високите гости ја демонстрираа својата подготвеност за дејствување при заседа на мала терористичка група, контролна точка со гонење на моторно возило и заседа, препад на населено место и заробување на високовредна цел и спасување на населението.
Генералот Скапароти, пред министерката Шеќеринска, ги пофали трупите за покажаната дисциплина и подготвеност.
„Сакам да ги пофалам вашите трупи за јасната обука и покажаната дисциплина и подготвеност, како и да истакнам дека тие користат НАТО стандарди и НАТО процедури. Тоа што денеска го видовме е навистина значајно“, изјави Скапароти.
Алијансата, нагласи Скапароти, високо го вреднува придонесот на Скопје во операциите на НАТО во Авганистан и учеството на вашите трупи во поддршка на меѓународните сили.
Министерката за одбрана Радмила Шекеринска, изрази уверување дека Македонија е сигурен партнер и сојузник, кој ќе продолжи да придонесува преку учество во меѓународни мисии.
„Како идна членка на НАТО од почетокот на оваа година го зголемивме македонскиот контингент во мисијата „Одлучна поддршка“ за 20 проценти. До крајот на годината испраќаме поддршка за изборите во Авганистан, но и дополнително зголемување на нашите трупи, изјави Шекеринска.
Изрази задоволство, што на дел од македонскиот контингент му е доверена заштитата на командата на мисијата во Кабул.