Мал инцидент се случи денеска при оддавањето почит на жртвите на масовните протести на 21-ви јануари 2011 година, што се одржа на булеварот „Народни херои“, пред Владата во Тирана.
Инцидентот се случил кога постар човек се обидел да му се приближи на албанскиот премиер Еди Рама за да му даде писменце, при што почнал да вика „Ти си анти албанец“.
Лицето, кое е идентификувано како Пал Шкемби, е приведено.
Секоја година на 21-ви јануари се оддава почит на четворицата убиени за време на масовниот протест кој се случи пред Владата пред осум годни.
На оддавањето почит, освен Рама и албанскиот министер за внатрешни работи Сандер Леши, присуствуваа и роднини на убиените, а и други граѓани, кои положија цвеќе.
Роднините на убиените изразија разочарување што се’ уште „не ја виделе правдата“ за нивните најблиски.
Преживеав трагедија. Смртта на брат ми Зивер Веизи беше неочекувана. Немаа поминато ни две години откако претходно поголемиот брат го усмрти автомобил. Правдата се’ уште не е најдена. Сепак, се надеваме дека новите правосудни институциите ќе го расветлат ова прашање, изјави сестрата на убиениот, Трендафила.
Во масовните протести, кои ескалираа пред Владата, беа убиени Алекс Ника, Зивер Веизи, Хекуран Деда и Фаик Миртај. Протестите ги предводеше тогашната здружена опозиција, на чело со социјалистите на Рама.
На протестите учествуваа неколку десетици илјади граѓани од сите делови на земјата. Тие се одвиваа мирно, но ескалираа кога демонстрантите почнаа да фрлаат тврди предмети врз полицискиот кордон и се обидоа насилно да влезат во Владата, извикувајќи „Бериша оди си“.
Полицијата употреби солзавец и водени топови за да ја растури толпата, а беше донесено и дополнително обезбедување од припадници на Национата гарда и поставена бодликава жица. Постоеа сомнежи дека врз демонстрантите пукале гардисти, но до ден денес случајот не е расветлен.
Актуелниот лидер на опозициските демократи, Љуљзим Баша, тогаш беше албански министер за внатрешни работи.
