Парламентот да го задолжи премиерот Бојко Борисов да изготви анекс на договорот на Бугарсија со Северна Македонија во кој ќе стои дека двете држави ќе се воздржуваат од секакви шпекулации и обиди за присвојување на историски настани и личности. Таков предлог поднесоа пратениците од „Атака“ во Парламентот, јавуваат бугарските медиуми.
Во анексот пишува дека одредени настани и личности ќе се прогласуваат за заеднички со одлука на комисијата, а други можат да бидат објавени дека припаѓаат единствено и само кон историјата на една од двете држави.
Предлогот има за цел со него да и се забрани на Северна Македонија до објавувањето на заедничките настани и личности „секакви шпекулации и обиди за присвојување“ на владетелите од цар Крум до цар Иван Владислав, сите историски личности поврзани со национално-ослободителната борба и борбата за обединување на бугарскиот народ во единствена држава во пределите на Бугарската Егзархија.
Не сакаме тензии, туку добра соработка. Целта на анексот е во иднина да спречи недоразбирања и поводи за тензии околу историски личности. Да ги чуваме сеќавањето и нашата историја и да не дозволиме со нив да се шпекулира, изјави лидерот на „Атака“, Волен Сидеров, додавајќи дека очекува поддршка на предлогот и од другите парламентарни групи.
Доколку Скопје не се согласи да го прифати изменетиот договор, Бугарија може еднострано да го раскине, аргументираат од „Атака“.