МКД: Проектот за болницата во Штип наеднаш се зголеми за 7 милиони евра

Завршувањето на градежните работи на клиничката болница во Штип ќе ја чинат државата дополнителни 7 милиони евра. Ова го бара изведувачот, грчката градежна компанија „Интракат“, со облазложение дека толку ќе чини машинското и електронското уредување на внaтрешноста на зградата поради надминување на претходно проектираните технологии. Но, што сѐ всушност се крие позади ова најново барање? Проектот требаше да чини 30 милиони евра, а сега наеднаш таа бројка станува 37 милиони евра, а можеби и повеќе.

Информациите на МКД.мк велат дека не случајно во овој период се случуваат и средбите на висок претставник на власта со еден од  главните менаџери на „Интракат“ Димитриос Кутрас, кој претходно беше директор на грчката компанија „Актор“, изведувач на автопатот Смоквица-Демир Капија.

И откако деновиве се соопшти официјалната одлука за дополнителни 7 милиони евра, се отвори прашањето зошто министерот за здравство Венко Филипче и поранешниот премиер Зоран Заев оваа зделка не ја завршиле со одлука на една од декемвриските владини седници? Зошто овој жежок костен се остави на техничката влада, заедно со опозицијата?