Економијата во земјава и покрај претстојните избори и техничката влада не смее да се стави на пауза. Директорите на државните институции одлуките треба да ги носат на време, а не да ги одложуваат поради изборите. Ваква порака испратија денеска од Советот на странски инвеститори во земјава пред почетокот на состанокот со претставници на Владата.
„Ги повикувам директорите на фирмите, и странски и домашни, да не чекаат одлуки да носат после изборите, туку да реагираат веднаш и сега да донесуваат одлуки“, рече Штефан Петер- Претседател на Совет на странски инвеститори.
На средбата со владините претставници се зборувало за проблемите со кои се соочуваат странските фирми кои работата во земјава.
„Ние не доставуваме проблеми до Владата, туку доставуваме решенија. Работиме на две иницијативи. Првата е поврзана во врска со царините, а втората е одливот на стручни кадри. Населението се иселува во други земји“, додава Петер.
Според владините претставници, набрзо ќе има решение за барањето за пониски царини.
„На состанокот има претставници и од Царинската управа и од Министерството за финансии и кога ќе се донесе законското решение тоа да биде за сите засегнат страни…“, рече Мила Царовска- вицепремиерка задолжена за економски прашања.
Странските инвеститори пред скоро една година побараа да се намалат царините при увоз бидејќи скоро сите суровини за производство во нивните капацитети во земјава доаѓаат од странство. Но, досега не се најде заедничко решение со Владата.