Високиот претставник на Европската унија (ЕУ) за надворешни работи и безбедносна политика, Жосеп Борел, нагласи дека дијалогот за нормализирање на односите меѓу Приштина и Белград, предводен од ЕУ, е неопходен за да се гарантира европската иднина и на Србија и на Косово.
„Иднината на целиот Западен Балкан, вклучително и Србија и Косово, е европска. ЕУ е решена да ги поддржува на секој чекор од нивниот пат. Но, за европската иднина да стане реалност за нивниот народ, дијалогот со посредство на ЕУ не може да биде заобиколен”, напиша Борел на својот профил на Твитер.
The future of the #WesternBalkans, including both Kosovo and Serbia, is European. As EU we are committed to accompany them on every step of their path. But to make the European future a reality for their people, there is no way around the EU-facilitated Dialogue.
— Josep Borrell Fontelles (@JosepBorrellF) May 27, 2020
Претседателот на Косово, Хашим Тачи изјави вчера дека нема волја да учествува во преговарачкиот процес предводен од Мирослав Лајчак, специјален претставник на ЕУ за дијалогот меѓу Белград и Приштина. Тој рече дека има целосна доверба во американското управување со дијалогот, оценувајќи дека тие успешно ќе го завршат дијалогот.
Портпаролот на Борел, Петер Стано, изјави денеска дека договорот меѓу Косово и Србија мора да биде во согласност со правото на ЕУ, неговите вредности и меѓународното право, да биде одржлив, прифатлив и за регионот и за земјите членки на ЕУ.
„Специјалниот претставник (Мирослав Лајчак) е во постојан контакт со сите релевантни партнери за да ги слушне нивните перспективи, очекувања и грижи, за да може дијалогот да започне без одлагање”, рече Стано.
