Аудио-снимките објавени во ден претходно е втора индиција којашто посочува дека лидерот на СДСМ, Зоран Заевм, е главата на криминалниот октопод којшто ја злоупотребува политичката моќ како премиер за истовремено да биде и наредбодавач во обвинителството и наредбодавач во судството, и судските и обвинителските постапки да ги тргува за високи суми на пари, рече на прес-конференција во саботата Антонијо Милошоски од ВМРО-ДПМНЕ.
„Преку вчерашните аудио материјали се гледа дека еден познат скопски адвокат господинот Димишков инаку брат на судијката Весна Димишкова разговара со посредници кои што се поврзани со судските процеси кои што ги води СЈО и им нуди трампа пари за правда“, рече Милошоски.
Потсети дека во аудио материјалот се споменуваат огромни суми пари сокои што еден од бизнисмените требало да биде пуштен на слобода, а се наоѓал во притвор.
„Ќе цитирам гласот за кој што се претпоставува дека е на адвокатот Димишков вели – „Дајте 6 милиони евра, и ќе ја завршиме работата“. Ова го тврди адвокатот Димишков, ова го нуди адвокатот Димишков, брат на судијката која што определила мерка притвор“, посочи Милошоски.
Укажа дека, имајќи ја предвид разврската на случајот „Рекет“, во кој за рекетирањето на бизнисменот Орце Камчев затворски казни од повеќе години добија поранешната шефица на Специјалното јавно обвинителство, Катица Јанева и поранешниот естраден лик и сосптвеник на телевизијата 1ТВ, Бојан Јовановски Боки 13, како и низата отворени прашања на оваа тема . се поставува прашањето дали адвокатот Димишков имал само лична моќ да нуди притвори, ослободувања од притвори и да бара пари за ослободувања од притвори. Или, пак, продолжо Милошоски, можеби адвокатот Димишков имал „и судска моќ и политичка моќ преку одреден спонзор“ за да може да издејствува кому да биде одредена мерка притвор и за колку пари да биде укината таа мерка притвор.
„Затоа многу сме зачудени што за адвокатот Димишков и за судијката Димишкова немало истрага во Јавното Обвинителство, во најмала рака за посредување и за уцена, или изнуда на пари од лица кои што биле предмет на обвиненијата на СЈО“, рече претствникот на ВМРО-ДПМНЕ.
Милошоски оцени дека клучното прашање кое се наметнува и од случајот и од аудио0снимките, е дали поранешниот премиер и лидер на СДСМ, Зоран Заев и неговиот брат Вице Заев, се „ликовите“ во чиешто име зборува адвокатот Димишков, и дали тој во нивно име бара 6 милиони евра.
„Дали тие се политичкиот центар на моќ каде што треба да се уплатат 6 милиони евра за да се укине одредена мерка притвор? Очигледно е дека се правени пазари со правдата. Сестрата судијка определува мерка притвор. Братот адвокат наоѓа посредници, бара пари, има центар за политичка моќ, и тие пари ги добиваат главните нарачатели на ваквите дејствија, и даваат наредба за укинување на мерката притвор“, илустрираше Милошоски.
За него тоа е недовсмислениот заклучок што може да се извлече од аудио-снимките објавени во петокот. Притоа истакна дека водечката обвинтиелка за организиран криминал Вилма Русковска потврди дека ги поседува во јавното Обвинителство.
„Обвинетиот и сега веќе осуден Бојан Јовановски во судот посочи дека рекетираните пари треба да се бараат кај семејството Заеви. Се поставува прашањето дали овие 6 милиони евра коишто ги побара адвокатот Димишков, исто така, треба да се бараат кај Зоран и Вице Заеви. Ова е веќе втора индиција којашто посочува дека Зоран Заев е главата на криминалниот октопод којшто ја злоупотребува политичката моќ како премиер за истовремено да биде и наредбодавач во обвинителството и наредбодавач во судството, и судските и обвинителските постапки да ги тргува за високи суми на пари. Ова најголема рекетарска шема во Република Македонија наречена „Рекет“ има и свој покровител и ние сме изненадени зошто госпоѓата Вилма Русковска не покренува до сега никаква истрага за оној за кого што има индиции дека е покровител на шемата пари за правда, а индициите упатуваат до лицето Зоран Заев“, рече Милошоски.
За него уште позагрижувачки е што станува збор за „системски организирана мафија“ во којашто „политички, обвинителски, адвокатски и судски структури“ заедно со посредници од подземјето тргувале со правдата и остварувале голема материјална корист.
„Аргумент во таа насока ни е и фактот што токму сестрата на посочениот адвокат, Весна Димишкова која беше судијка на претходна постапка во случајот „Империја“ кој е тесно поврзан со случајот „Рекет’ е токму таа која што ги води овие предмети, а нејзиниот брат е лично посредник за издејствување на поповолни мерки во овие предмети“, додаде Милошоски.
Посочи дека случајно или не, истата судијка е онаа којашто го замрзнува имотот на најголемата опозициона партија и поради тоа во ВМРО-ДПМНЕ се сомневаат дека и во двата случаи постои сериозно политичко влијание и политичка нарачка од еден центар на политичка и владина моќ.
„Прашањето е дали Зоран Заев директно или индиректно влијаел врз судските постапки, врз постапките на обвинителството и ги нарачувал и ги трампал обвинителските и судските мерки за рекетирање на пари и изнуда на пари. Ако Јавното обвинителство денес нема храброст да се соочи со овие индиции да ги истражи тогаш одговорите ќе бидат дадени по изборите кога во фер обвинителски и судски процес ќе можат да бидат одговорени сите овие дилеми кои што посочуваат дека Зоран Заев е можниот нарачател на ваквите рекетирања и изнуда на пари“, порача Милошоски.
Рече и дека поради сето тоа, изборот на граѓаните на изборите на 15-ти јули ќе биде „меѓу рекетарската шема на Зоран Заев и неговите најблиски судии и обвинители или опозиционата ВМРО-ДПМНЕ којашто е спремна да ја преземе довербата и одговорноста“ да се носи со ваквите девијации и за истите да има политичка и судска одговорност.
„На крајот би сакал да заклучам дека се додека адвокатот Димишков, судијката Весна Димишкова и нивниот можен политички нарачател Зоран Заев играат политички и финансиски игри со случајот „Рекет“, со притворите и пресудите и истите ги продаваат за големи суми на пари тогаш европскиот пратеник Рајнхард Прибе за џабе пишува извештаи за владеење на правото. Во Република Македонија со Зоран Заев, со адвокатот Димишков, со неговата сестра и ова обвинителство за жал нема владеење на правото, туку има владеење на големи пари за коишто се тргува со правдата“, заклучи Милошоски.