Претседателот на Косово Хашим Тачи изјави денеска дека за него е важно и од витално значење да се обезбеди внатрешен дијалог за продолжување на преговорите меѓу Србија и Косово.
Во текот на состанокот со претседателот на Демократската партија на Албанија Љуљзим Баша, Тачи нагласи дека од витална важност е прашањето за консензус, додавајќи дека исто така е важна координацијата со Вашингтон и Брисел.
– Денеска разговаравме за развојот на Косово и во Албанија, можностите за уште подобра соработка. Косово сака што поскоро да влезе во НАТО и ЕУ, рече Тачи.
Важно е да се постигне најширок можен консензус за европската перспектива, порача косовскиот претседател, пренесува Коха.
– Исто така разговаравме за дијалогот меѓу Косово и Србија. За нас е клучно да имаме институционален консензус на Косово. Од витална важност е да бидеме координирани меѓу Вашингтон и Брисел. Тоа би требало да се заклучи не во техничка смисла, туку поради меѓусебно признавање, рече Тачи.
Баша изрази поддршка на „доследните ставови“ на претседателот на Косово во поддршка на дијалогот, како и кохезија на политичките сили на Косово.
– Уверен сум дека целосната координација меѓу САД и ЕУ била и ќе остана предуслов за успех, рече Баша.
