Организацискиот секретар на ДУИ, Артан Груби, во интервју за албански „Шчип“ вели дека со СДСМ имаат секојдневни контакти кои тој очекува да се засилат со формирање на институции.
„Ние сѐ уште сме колеги во Владата и нашите контакти се секојдневни како две главни партии во земјата. Чекаме да заврши крајот на жалбениот процес и да ги продолжиме и засилиме контактите за воспоставување на институциите кои излегоа од изборите на 15 јули во соработка и одговорен дух“, вели Груби.
Како претходно и неговиот сопартиец Бујар Османи, и Груби посочи дека „црвената линија“ на ДУИ се договорите со Грција и Бугарија и Охридскиот договор, поради што, као што истакна, не доаѓа во предвид коалиција на ДУИ со Левица.
„Дел од некое евентуално алтернативно мнозинство би била партијата „Левица“ и ова е неприфатливо за нас и не доаѓа во предвид соработка со овој деструктивен и регресивен ентитет. Нема да дозволиме да се вратиме назад, без оглед на тоа дали сме во позиција или во опозиција. Нашиот пат кон еднаквост и интеграција во НАТО и во ЕУ не смее да биде загрозен од никого и тоа нема да го дозволиме“ порачива Груби.
За лидерот на Алијанса за Албанците, Зијадеин Села, Груби вели дека тој „му забил нож“ во грбот на првиот премиер Албанец, и тоа кога е „потребно обединување на Албанците“.
