Според проценките што ги направи Министерството за образование и наука во Македонија дури 40.000 деца немаат пристап до електронски уред за следење на наставата, соопшти министерката Мила Царовска, при претставувањето на Националната програма за онлајн образование.
Министерката најави дека пристап до интернет може да се овозможи, но дека државата не може да обезбеди толку уреди за секое дете.
„Тоа е затекната состојба, која не може да се надмине во период од еден месец. За тие деца ќе имаме часови (15-минутни видеа) кои ќе бидат поставени на Националната телевизија, на каналите коишто се веќе обезбедени и преку нив тие ќе може да бидат изложени на информациите коишто треба да ги добијат во училиште“, рече министерката за образование Мила Царовска.
