Европа, соочена со вториот бран на епидемијата, во неделата го надмина прагот од 250.000 смртни случаи од коронавирус. За една недела се забележани повеќе од 8.000 смртни случаи, што е најтежок неделен биланс од средината на мај.
Многу европски земји се обидуваат да се заштитат со воведување на посилни мерки за заштита.
За време на викендот, во Франција е регистриран рекорден број на пациенти со Ковид-19, а поради зголемувањето на бројот на пациенти, во саботата е воведен полициски час од 21 до 6 часот наутро, што ќе трае најмалку еден месец, пренесува БиБиСи и додава дека секој што ќе го прекрши, мора да има валидна причина за тоа или да плати казна од 135 евра.
Од понеделник, сите барови и ресторани во Белгија се затворени четири недели, а полицискиот час е во сила од полноќ до пет наутро. Исто така, воведена е забрана за продажба на алкохол по 20 часот.
Швајцарија воведе задолжително носење маски на сите затворени места, како и забрана за собирање повеќе од 15 лица на едно место.
Чешка сè уште не одлучила дали е потребен карантин, а таа земја во моментов е прва според бројот на заразани во Европа.
Денес во Ирска ќе бидат презентирани нови мерки, а се претпоставува дека ќе бидат затворени несуштинските продавници и компании.
Во Германија, канцеларката Ангела Меркел, поради зголемениот број на зарази, ги повика луѓето да останат дома и да избегнуваат патувања доколку е можно.
Исто така, во Италија, од денес, работата на барови и ресторани, како и на локални настани е ограничена.
