Ја повикуваме македонската влада, наместо да го ограничува користењето на името „Македонија”, да го поддржува слободното изразување на македонските граѓани, и да го поттикнува и понатаму користењето на името „Македонија” бидејќи тоа е нашето вековно наследено историско име. Секое ограничување е неприфатливо и ќе предизвика силни реакции кај македонскиот народ, порачува Централниот совет на Македонците од Берлин, кој ја застапува Македонската заедница во Германија.
Тие во во писмена реакција до редакцијата на Плусинфо велат дека жестоко реагираат по повод информациите во јавноста дека се оспоруваат називите „Македонија” односно „македонски” при регистрација на здруженија односно компании во Македонија, се вели.
„Уставот на Македонија и самиот таканаречен „Преспански Договор” не предвидува такви рестрикции. Доколку овие информации се точни, ги повикуваме оштетените да ги преземат сите можни правни мерки во рамките на македонскиот судски систем. Тоа би значело кршење на основните човекови права, истовременo би се кршел Уставот на Македонија и би се излегувалo од рамките на таканаречениот „Преспански Договор”.
Дури и самиот „Преспански Договор” вели дека секое трговско здружение, здружение на граѓани, и други организации кои не се финансирани од државата, може непречено да го користи називот „Македонија” односно „македонски”. Се прашуваме кој е поводот и причината што очигледно некој сака да го спречи користењето на овие називи кои лежат во срцето на секоја Македонка и секој Македонец, дали во матичната држава, така и во дијаспората?“, се вели во реакцијата на Македонците во Германија.
