Најостро го осудуваме неспособниот министер за здравство Венко Филипче во неговиот арогантен обид да се пресметува со претседателот на државата Стево Пендаровски, реагира Граѓанската опција за Македонија – ГРОМ.
– Господинот министер за здравство е најнеуспешниот министер во историјата на Македонија и неговиот мандат е исполнет со обиди за криминални провизии, неуспех во менаџирањето со здравството, без ниту една набавка на современа опрема потребна за врвна здравствена заштита, без набавка на ниту еден респиратор, доцнеше со хигиенски материјали, скафандери и друга заштитна опрема за вработените во ковид центрите и со тоа го доведе во прашање здравјето не само на здравствените работници туку и на целото граѓанство – велат од ГРОМ.
Според ГРОМ, дека се работи за изгубен случај, говори фактот што тој и неговиот премиер ја одбија понудата за вакцини од Русија и Кина, со образложение дека ние сме биле земја членка на НАТО.
– Венко Филипче и Зоран Заев се вистински пример како не треба да се раководи и од нивното лошо раководење трпи целото општество. Обидите да се замолчи опозицијата и критиките на медиумите блиски до власта се проширија и врз претседателот на државата. Наместо да се сокријат зад сопствениот срам што народот бараше чаре во Србија и да ја сфати добронамерно забелешката на претседателот, тој демонстрираше невидена ароганција непоимлива за министер кој соборува светски рекорди во смртност од ковид 19. Ако немаат право да дадат забелешки на лошото министерување на Филипче опозицијата, граѓаните и претседателот на државата, тогаш кој – велат од ГРОМ.
Од таму додаваат дека го подржуваат претседателот Стево Пендаровски уште поенергично да реагира за сите неуспеси, промашувања и скандали кај било кој што троши народни пари.
