Заострувањето на анти-ковид мерките токму во овој период, една седмица пред Рамазан е резултат на тоа што здравствениот систем е преоптоварен и на непочитувањето на мерките, што придонесе за зголемување на бројот на нови случаи на Ковид-19, изјави министерот за здравство Венко Филипче.
Тој додаде дека мерките се преземени со цел заштита на здравјето на граѓаните и дека не се политички.
Филипче вели дека процесот на имунизација во земјата тече нормално, без проблеми, додавајќи дека вчера вакцината ја примиле околу 2.500 граѓани.
Првиот човек на здравство најави средба со претставници на приватните болници за да се изнајдат начини – како овие установи да им помогнат државните клиники во борбата против пандемијата. Тој изјави дека неколку приватни болници веќе прифатиле да „позајмат“ медицински персонал. Овие специјалисти ќе бидат ангажирани во „Козле“. Од Министерството за здравство смируваат дека има капацитет и слободни кревети за новозаразените пациенти.
