Речиси истите правила и предуслови што важат за влез на странски туристи во Грција, односно или поседување сертификат за вакцинација или потврда за прележан коронавирус или негативен тест, од денеска важат и за патувањата на грчките острови, без оглед дали е со брод или авион.
За патување со сертификат за вакцинација, потребно е да се поминати 14 дена од ревакцинацијата, а признати се и европскиот дигитален сертификат и сертификатите од трети земји.
Оние кои прележале Covid-19, може да патуваат со соодветна потврда, издадена 30 дена по првиот позитивен тест и со важност 180 дена од позитивниот тест.
Другитем пак, кои не се вакцинирани, ниту пак прележале, потребно ќе биде да направат или PCR тест до 72 часа пред патувањето или рапид тест 48 часа претходно. И во овој случај, Грција ги прифаќа и тестовите од други земји, доколку потврдата за негативен резултат од тестот е на грчки, англиски, француски, германски, шпански, италијански или руски јазик.
Децата до 12 годишна возраст (родени по 1-ви јули 2009 година), ќе патуваат слободно, а за оние од 12 до 18 години, потребен е било каков тест, вклучително и селф тестот, односно тестот за домашна употреба.
За враќање од островите, заменик- министерот за цивилна заштита на Грција Никос Хардаљас, во четвртокот рече дека постои препорака сите над 12 годишна возраст да прават селф тестови.
Досега, на островите, можеше да се патува и со направен тест за домашна употреба, откако граѓаните, резултатот го пријавуваа на специјален сајт.