Власта се обиде да прикрива информации за тешката сообраќајка на патниот правец Скопје – Охрид во која учествувал Зоран Милевски Кичеец. Друго објаснување нема, кога на лице место се видени вработени во 6-та управа, а има информации дека е вршен притисок врз сведоци на настанот, медиуми и новинари да не изнесуваат информации за сообраќајката, реагира ВМРО-ДПМНЕ на вчерашната сообраќајка со жртви во која учествуваше и осудениот за „Рекет“.
„Причината е јасна, Кичеец наместо во затвор слободно се шета по патиштата низ Македонија, а сега гледаме дека учествувал во трагична сообраќајна несреќа со двајца загинати и неколку повредени. Зоран Милевски Кичеец е осуден за мега скандалот „Рекет“, но изгледа е привилегиран од власта на Заев штом е уште на слобода и хара низ државата. Очигледно омилениот специјалец на Заев за криминал Зоран Милевски Кичеец кој рекетираше милиони беше толериран и му се дозволуваше да аздисува, за вчера да убие луѓе во сообраќајна несреќа. Кој ќе понесе одговорност за овој скандал? Кој дозволи криминалец наместо во затвор да хара по патиштата во Македонија“, прашуваат од опозицијата.
Според ВМРО-ДПМНЕ, судот, МВР и владата на Заев се во спрега со криминалот.
„Тие ги штитат криминалците, им дозволуваат слободно да шетаат, а кога ќе се случи нешто како синоќешната сообраќајка дури и се обидуваат да ги прикријат и заштитат“, се наведува во соопштението.
