Министерството за здравство информира дека од денеска почнува пријавувањето на граѓаните за вакцинирање од сезонски грип.
Годинава сенабавени 40.000 дози четиритипни вакцини против сезонски грип.
Вакцините кои се бесплатни се наменети за ризичните групи: стари лица (над 65 години), лица со хронични заболувања, здравствени работници, бремени жени и децата на возраст од 6 месеци до 5 години.
Пријавувањето за вакцинација против сезонски грип се врши преку страницата vakcinacija.mk.
Со пополнување на формата се регистрирате за вакцинација директно во системот Мој Термин.
Согласно распоредот предвиден во планот за вакцинација, по пат на смс ќе добиете информација за точниот датум и час кога треба да се вакцинирате на пунктот кој ќе го изберете при регистрацијата.
Од Министерството велат дека не е доцна, граѓаните да се вакцинираат против грип во ноември или декември, бидејќи согласно епидемиолошките податоци, оваа болест во последните десетина сезони го достигнува пикот кон крајот на месец февруари.
Според Министерството, вакциницијата против грип не штити од ковид 19, но истата е многу значајна во услови на пандемија со ковид 19 и влијанието на здравствениот систем.
– Во состојба на олабавување на рестриктивните мерки кога се враќаат социјалните контакти и патувањата се зголемува ризикот од ко-циркулација на ковид 19 и грип. Со тоа може да очекуваме оптоварувањето од сезонскиот грип да биде надополнето со оптоварувањето од ковид 19. Ризичните групи за грип, се истите кои се под најголем ризик и од ковид 19, поради што се препорачува вакцинација против грип на истите. На тој начин ќе се избегне и дополнително оптоварување на здравствениот систем, бидејќи лицата заболени од грип би се хоспитализирале во ковид центрите – велат од Министерството за здравство.
