За лидерска средба треба да има согласност од двете страни, изјави во саботата вечерта претседателот Стево Пендаровски во одговор на новинарски прашања.
Претседателот рече дека треба да се почека понеделник, бидејќи состојбата во моментот е „пата-пата“.
„Да почекаме од понеделник да видиме како ќе се развива ситуацијата по овој неуспешен обид за изгласување недоверба на Владата. Јасно е дека состојбата сега е пата-пата. Да видиме дали од понеделник ќе се формира ново, ќе се обнови постојното или ќе се зголеми ова што е досега мнозинство од 61 пратеник“, рече Пендаровски.
Во одговор на новинарско прашање за можно одржување на лидерска средба, Пендаровски посочи дека неговиот став за да се одржи таква средба „од кој било аспект на тековната политичка криза, што започна по вториот круг на локалните избори, потребна е взаемна согласност од власта и опозицијата“.
Прашан дали ќе има предвремени парламентарни избори, шефот на државата појасни дека според Уставот, постои само еден начин за распишување предвремени избори, а тоа е пратениците со 61 глас „за“ да го распуштат Собранието.
