„Специјалната воена операција“ на Русија ќе заврши кога НАТО ќе престане да ја користи украинската територија за да ѝ се заканува на Русија, изјави Алексеј Полишчук, висок претставник на руското Министерство за надворешни работи, пренесува руската новинска агенција Тас.
– Специјалната воена операција ќе заврши кога ќе се исполнат нејзините задачи. Меѓу нив се заштитата на мирното население на Донбас, демилитаризацијата и денацификацијата на Украина, како и елиминацијата на заканите за Русија кои доаѓаат од украинската територија поради нејзино заземање од страна на НАТО земји, рече Полишчук.
Според него, „специјалната операција се одвива според планираното и сите нејзини цели ќе бидат постигнати“.
