Европа ќе доживее нови стратешки проблеми доколку нема успех во интеграцијата на земјите од западен Балкан, изјави во понеделникот на традиционалниот форум во Блед унгарскиот министер за надворешни работи и трговија Петер Сијарто.
Во своето излагање на Бледскиот стратешки форум Сијарто рече дека западниот наратив за судирот во Украина не е ист во земјите кои не се на европскиот и северноамериканскиот континент. Шефот на унгарската дипломатија тоа го смета за своевиден стратешки пораз на Европа и истакна дека оттаму е клучно Европа што поскоро да постигне мир во своето опкружување.
„Мислам дека моменталната ситуација мора на сите јасно да им покаже дека Европската унија мора да ја забрза интеграцијата, а бидејќи колку сме поголеми, толку сме посилни“, рече Сијарто.
„Доколку не сме способни повеќе да интегрираме, особено западен Балкан, нѐ чекаат нови стратешки проблеми“, заклучи Сијарто чијашто земја бараше и издејствува изземање од санкциите на ЕУ за рускиот енергетски сектор.
„Зошто купуваме гас од Русите? Бидејќи физички не можеме да го купуваме никаде на друго место. Затоа не ги и нема да ги поддржиме енергетските санкции. И тоа нема руски аспект, тоа е чисто унгарско прашање“, истакна Сијарто.
