Бразилската фудбалска ѕвезда Нејмар во понеделник мора лично да се појави на судењето во Барселона, објави во саботата францускиот дневен весник Le Parisien.
Во каталонската престолнина Нејмар е обвинет за неправилности при неговиот трансфер од бразилски Сантос во Барселона остварен во 2013 година.
Нејмар, кој во неделата вечерта со почеток во 20,45 часот треба да настапи во дербито на колото во француското првенство меѓу неговиот тим ПСЖ и Олимпик Марсеј, тврди дека во трансферот нема ништо спорно.
Државното обвинителство во Барселона бара Нејмар да биде осуден на двегодишна затворска казна, како и парично да биде казнет во износ од 10 милиони евра, доколку биде прогласен за виновен.
Во Шпанија е вообичаено затворските казни во траење до две години да се изрекуваат како условни, доколку обвинетиот претходно не е осудуван за тешки кривични дела.
