Украина треба да го признае Крим како дел од Русија и да се откаже од кандидатурата за членство во НАТО заради мирот, изјави менаџерот на американскиот хеџ-фонд „Першинг Сквер Капитал Менаџмент“, милијардерoт Бил Акман. Исто како и извршниот директор на SpaceX и Tesla, Илон Маск пред него, Акман е критикуван на интернет затоа што сугерира дека Киев треба да биде подготвен да направи отстапки за да ги прекине непријателствата.
„Крим беше дел од Русија до 1954 година и главно е составен од етнички Руси, што очигледно беше причината зошто светот направи малку кога Русија го анектираше во 2014 година“, напиша во понеделникот на Твитер Акман, извршен директор на Першинг Сквер Капитал Менаџмент.
Тој додаде дека границите треба да се вратат таму каде што биле пред 24 февруари, кога Русија ја започна својата воена операција во соседната земја и пред четирите поранешни украински региони да гласаат за приклучување кон Русија. Тој додаде дека Западот потоа треба да му помогне на Киев во неговото закрепнување, додека земјата треба да остане надвор од НАТО.
„Ќе се спасат илјадници животи и ќе може да се инвестираат ресурси за обнова во Украина наместо во војна која само ќе доведе до повеќе уништување и смрт“, напиша милијардерот.
„Ако постои остварлив пат кон мирот, ние треба да го следиме. Секој ден кога конфликтот продолжува, ризикот за светот се зголемува“.
Откако доби критики на интернет, Акман го разјасни својот став во вторникот.
„Вчера предложив дека разумно мировно решение може да биде враќање на границите од 24 февруари, Маршалов план за обнова на Украина и одлука на Украина да не се приклучи на НАТО. Потоа излегоа ножевите, напиша тој.
Прашувам: Дали за Украина е подобро да биде во продолжена долготрајна војна која води до уште 1.000 повеќе смртни случаи и уништување на земјата или има смисла некакво преговарачко решение? … Во никој случај не сум експерт. Едноставно ме растажува кога гледам смрт и уништување без очигледен датум на завршување или можност за решавање.
„Во договореното решение, двете страни мора да отстапат нешто или нема можност за решение. Што е најмалку што двете страни можат да признаат дека е прифатливо и за двете? Што ми недостасува во мојата анализа? Какви подобри идеи имате?“ праша Акман.
Коментарите на Акман дојдоа откако повеќе јавни личности на Запад даваа предлози за можен мировен договор меѓу Русија и Украина.
И Елон Маск овој месец понуди своја визија за мировно решение, што вклучува Украина да го признае Крим како руска територија. Киев и западните функционери брзо го критикуваа Маск за, како што сметаат, план кој во голема мера ја фаворизира Москва.
